ओडिशा जगरनॉट्सचा मुंबई खिलाडीसवर मोठा विजय; ओडिशा जगरनॉट्स गुणतालीकेत पहिल्या स्थानावर

 जनलोक वार्ता न्यूज नेटवर्क 

भुवनेश्वर, ९ जाने.: अल्टीमेट खो-खोच्या सीझन २ मध्ये आज साखळी समन्यांचा शेवटचा दिवस होता. आज झालेल्या पहिल्या सामन्यात ओडिशा जगरनॉट्सने मुंबई खिलाडीसवर १०  विजय संपादन केला. हे सामने कटक येथील जवाहरलाल नेहरू इनडोअर स्टेडियमवर सुरु आहेत. आजच्या सामन्यामध्ये एम. शिबिनला अष्टपैलू खेळाडूचा पुरस्कार देऊन गौरवण्यात आले. 

आज झालेल्या पहिल्या व एकूण २९ व्या सामन्यात ओडिशा जगरनॉट्सने मुंबई खिलाडीसवर ३४-२४ (मध्यंतर १५-१४) असा दहा गुणांनी विजय संपादन केला. मुंबई खिलाडीसने नाणेफेक जिंकून प्रथम संरक्षण घेतले व ओडिशा जगरनॉट्सला आक्रमणासाठी आमंत्रित केले. सात मिनिटांच्या पहिल्या टर्नमध्ये ओडिशा जगरनॉट्सने पॉवर प्लेने सुरवात केली (यात दोन वजीर घेऊन खेळू शकतो व वजीर कधीही कोणत्याही बाजूला जाऊ शकतो. त्याला दिशेचे नियम लागू होत नाहीत.) मुंबई खिलाडीसच्या पहिल्या तुकडीतील हृषिकेश मुर्चावडेला एमडी मिराजुल सहज स्पर्शाने बाद केले तर एम. शिबिनला अक्षय मासाळने स्तंभात बाद केले तर प्रतिक देवारेला विसाग एस ने बाद केले मात्र त्यापूर्वी त्याने संघाला दोन ड्रीम रन्स मिळवून दिले (संरक्षण करताना कोणतीही तुकडी तीन मिनिटे संरक्षण केल्यानंतर त्या टीमला १ ड्रीम रन मिळतो व ती संपूर्ण तुकडी बाद होईपर्यंत प्रत्येक ३० सेकांदा नंतर पुन्हा १-१ गुण मिळवता येतो.) व हि तुकडी ३.३६ मिनिटात बाद झाली. दुसर्या तुकडीतील एस. श्रीजेशला मनोज कुमारने आकाशीय सूर मारत बाद केले. अविक सिंघाला मनोज कुमारने सहज स्पर्शाने बाद केले तर सचिन पवार मैदानातून बाहेर गेल्याने बाद झाला व हि तुकडी एकूण ६.२२ मिनिटात बाद झाली व ओडिशा जगरनॉट्सने गुणफलकावर १२-२ अशी नोंद केली.     

दुसऱ्या टर्न मध्ये मुंबई खिलाडीसच्या खेळाडूंनी सुध्दा पॉवर प्लेने सुरवात केली व दमदार आक्रमण सुरु केले. ओडिशा जगरनॉट्सच्या पहिल्या तुकडीतील देबेंद्र नाथला गोविंद यादवने सहज बाद केले, विशालला आकाशीय सूर मारत व निखिल सोडयेला सहज स्पर्शाने मिलिंद कुरपेने लागोपाठ बाद करत जवळजवळ सव्वा तीन मिनिटात या तुकडीला बाद केले व एक ड्रीम रन निखिलने मिळवून दिला. दुसऱ्या तुकडीतील विशाल ओरमला एम. शिबिनने आकाशीय सूर मारत, शोभग श्रीगंदाला व एस. विसागला एस. श्रीजेशने लागोपाठ सहज स्पर्शाने बाद केले व मध्यंतराला ओडिशा जगरनॉट्सने मुंबई खिलाडीसवर १५-१४ अशी एक गुणाची निसटती आघाडी घेतली.   

मध्यंतरानंतर तिसऱ्या टर्न मध्ये ओडिशा जगरनॉट्सने मुंबई खिलाडीसच्या पहिल्या तुकडीतील गोविंद यादवला एमडी मिराजुलने आकाशीय सूर मारत तर कोमलला सिद्धेश्वर तुडुने सहज स्पर्शाने बाद केले व शिवाला विशालने आकाशीय सूर मारत बाद केले व हि तुकडी सव्वा दोन मिनिटाच्या आत बाद झाली. दुसऱ्या तुकडीतील सुधीर कुमारला मनोज कुमारने व सुनील पात्राला सिद्धेश्वर तुडुने आकाशीय सूर मारत बाद केले तर मिलिंद कुरपेला अक्षय मासाळने सहज बाद केले व हि तुकडी ४.४० मिनिटात बाद्ब झाली तर तिसऱ्या तुकडीतील एम. शिबिनला विशाल ओरमने आकाशीय सूर मारत बाद केले व त्यावेळी गुणफलकावर ओडिशा जगरनॉट्सने मुंबई खिलाडीस २९-१४ अशी १५ गुणांची आघाडी घेतली होती. 

शेवटच्या व चौथ्या टर्न मध्ये ओडिशा जगरनॉट्सच्या पहिल्या तुकडीतील निरंजन सामलला पी. शिवा रेड्डीने सहज बाद केले, पी. महेशाला (२.५५ मि. संरक्षण) गोविंद यादवने सहज स्पर्शाने बाद केले तत्पूर्वी पी. महेशाने ३ ड्रीम रन्सचे गुण मिळवून दिले तर एमडी मिराजुलला (१.५५ मि. संरक्षण) गोविंद यादवने आकाशीय सूर मारत बाद केले मात्र मिराजुलनेही २ ड्रीम रन्सचे गुण मिळवून दिले व हि तुकडी ५.२० मिनिटात बाद झाली. दुसऱ्या तुकडीतील संजय कुमारला हृषिकेश मुर्चावडेने तर मनोज कुमारला एस. श्रीजेशने सहज बाद केले व ओडिशा जगरनॉट्सने मुंबई खिलाडीसवर ३४-२४ असा १० गुणांनी विजय संपादन केला.  या सामन्यात मनोज कुमारला उत्कृष्ट आक्रमक, पी. महेशाला उत्कृष्ट संरक्षक तर एम. शिबिनला अष्टपैलू खेळाडूचा पुरस्कार देऊन गौरवण्यात आले.